Koalicioni PAN të vetmen alternativë për ta krijuar Qeverinë e ka “pazarin” me deputetë individualë nga koalicioni LAA, apo nga lëvizja “Vetëvendosje”. Oferta e tyre u refuzua nga liderët e këtyre partive, shkruan sot, gazeta Zeri.

Koalicioni PDK-AAK-Nisma (PAN) rrugën e vetme për ta formuar Qeverinë e ka të marrë deputetë individualë nga dy blloqet e tjera, lëvizja “Vetëvendosje” dhe koalicioni LDK-AKR-Alternativa (LAA), pasi që ftesa e saj u refuzua nga liderët e këtyre partive.

Përfaqësues të koalicionit më të madh thonë se po që se partitë nuk do të pranojnë t’i bashkohen PAN-it dhe ta votojnë Ramush Haradinajn për kryeministër, atëherë do të vazhdojnë me partneritet me deputetë veç e veç.

Ata janë të bindur se javën që vjen do të formohet Qeveria e re, në krye me kandidatin për kryeministër, Ramush Haradinaj. Por pavarësisht kësaj, nuk pranojnë të tregojnë se cilët deputetë do ta votojnë të nominuarin e tyre për shef të ekzekutivit.

Nga ana tjetër, analistët politikë thonë se do të duhej të krijohej një qeveri më e gjerë edhe pa Listën Serbe si faktor kyç në qeverisje.